زي الحمام زي اليمام – شعر عامية
زي الحمام زي اليمام – شعر عامية
اشرف الشناوي شاعر عاميه البرامون – المنصوره
خطفوا غنايا
وضحكتي
عرفوا طريقي
وسكتي
واما وصلوا القلب
قاموا…. حبسوا
فيا فرحتي
اللي عيشنا ياما ليهم
واللي خيرنا كان ماليهم
باعوا فينا واشتروا
فتحوا باب الحزن واما
وقعنا في السكه افتروا
هزوا فينا وغربلوا
ضاع اللي ضاع من عمرنا
واحلام كتير راحت خلاص
نحمد ونشكر ربنا
كان اسمهم كدا بالرصاص
فوقنا من الشوق والوجع
هنداري كل اللي انقطع
ونكمل المشوار غنا
ونعدي بر الاحتمال
نرمي الجراح وسط اللي راح
ونطير ونرقص في البراح
زي الحمام زي اليمام
مطرح مايلقي
الشوق ينام
والفجر جي بنور معاه
والصبح يبدر وفي غناه
والأرض تحبل بالأمل
والشمس بتصحي البيوت
والحلم لو ينقص نموت
والليل عويل
يرمي الوجع والناس تشيل
رغم البكا ووسط العياط
الورد بيشق البلاط
ويكمل الدور
في الحياه
……………………..
