احفر بإبرة – شعر عامية
احفر بإبرة – شعر عامية
وحيد الجمال
واعمل لنفسك ألف بير
وإن شاالله بعده تكون أسير
بعد السراب والاغتراب
هتعود وتتنصّب أمير
السر لو بحته لغيرك
وسبته يهرب من لسانك
الخوف هيتبصّص عليك
وبكل باطل هيقضيك
هو معاك دايمًا شريك
قافل بسلطانه الشفايف
وملجّمه والكل شايف
سرج الليجام مُرّ ومكايد
وإنت اللي حاضر
وإنت اللي غايب
عايش في دمك ألف شايب
بيحط فيك كل المعايب
باب الضمير يفضل موارب
تفضل خطاك بين العقارب
وتسيب قرار بعدك لغيرك
إوعاك توافق بالمساس
ولا تطلبوا من الندل فاس
وحمارتك العارجة أميرة
تغنيك وتعملك أساس
ولا تبقى للحوجة مداس
تكسر في همّك ألف كأس
شرب الوجع والاحتباس
أشبه بشربك لتر جاز
وسؤال بيفرّق جوّه ناس
ملهاش مشاعر ولا أساس
بالغل مربوطة وأسيرة
متلطّخة صورة وسيرة
ملهاش في نعلك أي قيمة
الصاحب الجدع الأصيل
شيله فوق راسك وزير
والخاين الكدّاب عويل
إوعاك تعامله في أي ديل
هيعيش عليل ويموت ذليل
ابن الأصول يحفظ عهودك
وقت الغياب يفضل يصونك
ولا عمره هيفكّر يخونك
حارس أمين ودراع يمين
على ضهره شايلك ألف ميل
ولا عمره كلّ ولا عمره ملّ
ولا عمره منك راح يشيل
أصل الأصيل ملهوش مثيل
محفورة سيرته لألف جيل
