العجوة الصعبة – طرفة
العجوة الصعبة – طرفة
زين ممدوح
جملات.. الا قولي يا مرزوق شايفاك راجع من مصر كده مبسوط؟
مرزوق.. طبعا يا بت هو حد يبقى في مصر ويتعكنن!
جملات..بس المره دي راجع مش زي عوايدك !
مرزوق.. أصلي قابلت حد قريبي وطلع عيلتهم أصلها من كفر أبو السعد!
جملات.. قولي احكيلي كلي آذان صاغية
مرزوق.. وأنا ماشي كده في الشارع لا بيا ولا علي حد خبط فيا خبطه جامده قوي، ومسكنا في بعض
جملات..على طول كده
مرزوق ..وبدأها بالنغمة إياها
جملات.. نوكيا ولا إيه
مرزوق…لا يا بت نغمة إنت مش عارف بتكلم مين ؟
قلت له تطلع مين بسلامتك؟
رايح قايلي بالفم المليان أنا من المخابز
مرزوق.. لا مؤاخذة جنابك ،حضرتك رغيف بك أبو ردة
راح برم شنبه: أيوة يا جاهل!
جملات.. تلاقيك طيب وسكت له
مرزوق..أبدا وحياتك، قولت إذا إنت كنت في المخابز آني شغال في الكحك العلمي !
رايح معترض كحك علمي إيه مفيش الكلام ده بعد الاستاذ قمحاوي ما سافر بلاد بره،وبقى بيجلنا بالعجوة الصعبة!
فرحت مصلح له، قصدك العمله.قالي يا سيدي ما تدقش أهو كله معمول!
جملات…وبعدين
مرزوق.. وكلمه منه على كلمتين مني ،تعرفي طلع من عيلة مين في الكفر؟
جملات…وأعرف منين
مرزوق…طلع من عيلة المعاجين
جملات…هو فيه في الكفر عيلة اسمها المعاجين
مرزوق.. يوووه يا بت دا ليهم فروع في كل حته
جملات…وطبعا رحبت بيه
مرزوق…قلت له دا إحنا طلعنا قرايب كمان،وسألني من عيلة مين في الكفر، قلت من عيلة المطحونين
إستغرب حبتين وقالي هو فيه في الكفر حد من المطحونين دلوقتي مش كانوا هاجروا وارحو استراليا
مرزوق…أيوة صحيح ،بس معجبهمشي الطحن هناك، قالوا بلدنا اولى بينا
جملات…فعلا يا مرزوق الطحن هنا حلو وناعم !
مرزوق…أمال إيه يا بت المطحونين دول أحسن ناس !!
