الضغط العالى أو فرط ضغط الدم …. مقال بقلم د.أحمد دبيان
الضغط العالى أو فرط ضغط الدم …. مقال بقلم د.أحمد دبيان
أمراض كتير مزمنة بداياتها مالهاش أعراض عكس الأمراض الحادة زى الحمى الالتهابية البكتيرية او الفيروسية .
أمراض الروماتويد والضغط والذئبة الحمراء بداياتها وجع فى المفاصل تعب وارهاق وخمول وممكن مفيش اعراض على الاطلاق.
الضغط العالى بالذات قاتل صامت.
بدايته بلا بدايات تقريياً لكن نهايته عنيفة ودموية ومدوية .
الضغط العالى له نوعين
النوع الأول
فرط الدم الأساسى أو الأولى
والثانى
اسمه
ارتفاع الضغط الثانوى
الأول اسبابه مش معروفة لكن بيحصل ان المستقبلات فى الشرايين بتبدأ ما تستجيبش لتتظيم الدورة الدموية وتروية الأعضاء الا على المستويات الأعلى .
طبعاً فيه حوار انزيمى هورمونى بيحصل والمايسترو فيه الكلى اللى بتتأثر كونها مكونه فعلياً من أوعية دموية دقيقة.
زمان ما كانش فيه ادوية للضغط العالى أو فرط الضغط لكن الأطباء من اول ابقراط لجالينوس لابن سينا لبختيشوع لوليم هارفى فهموا ان الملح وتقليله ممكن يتحكم فى الحالات الاولية وغير المتفاقمة .
مع تطور الطب والاكتشافات ووسائل التشخيص ظهر ان فيه نوع ثانوى من فرط الضغط
وده بيكون انعكاس لخلل هورمونى زى متلازمات كوشينج وزيادة الألدوستيرون او اورام على الغدة الفوق الكظرية او ضيق فى شرايين الكلى .
فى كل الاحوال فرط الضغط قاتل صامت لان الجسم بيتعود على المستويات المرتفعة منه دون أعراض تقريباً
بل على العكس يوم ما حتبتدى الدوا ممكن يحصل دوخة وخمول فى الايام الاولى لان الأعضاء اللى اتعودت على المستويات المرتفعة بتحتاج ايام علشان اعادة ضبط المستقبلات اللى فيها.
فرط الضغط الاولى بيتعالج بتقليل الملح ، الرياضة وادوية تطورت كثيراً فى تصنيفاتها والطبيب مهمته يختار الامثل حسب الجنس والنوع والعرق واللى بيختلف فى استجابته لمختلف العقاقير.
من غير ما يتم التحكم فى فرط الضغط ممكن المريض ييجى بجلطات فى المخ
نزيف فى المخ
جلطات فى القلب
شق فى الاورطى
وفشل كلوى مزمن
الضغط من النوع الثانوى بيبقى له علاجات هرمونية او جراحية حسب المرض الأولى المسبب.
الضغط والسكر كامراض مزمنة اكبر مسبب للفشل الكلوى والجلطات القلبية والمخية.
تداووا ده كان الامر النبوى
ولما يبقى فيه علاج اكتشفه العلم اللى ربنا وهبه للانسان ونمنعه علشان دجل وخرافة وانظمة لم تتبع المعايير العلمية
فده اسمه القاء بالنفس الى التهلكة او انتحار بطئ.
