الأرض – شعر عامية
الأرض – شعر عامية
اشرف الشناوي
شاعر عاميه
البرامون
المنصوره
مش هي الارض
اللي بتحبل نور ……
مش دا التوت
اللي زرعته
ولا دي الشجره
اللي هتطرح تين
ولا دي الناس
اللي هتقدر تضحك
طول مالقلب حزين
ولا دي الشمس
اللي شايفها حزينه
وتدفي بنورها البساتين
ولا دا القمر
اللي بيضحك بالليل
ونكمل وياه الحواديت
طب فين ستي اللي بايدها
كانت ترقص فدادين
وطبطب عالارض
فتطرح قناطير
الأرض بتعشق
وتحس بروحنا
لو كنا زي العصافير
الأرض تحب اللي بيعزقها
ويلم في توبها
ويسقيها بضمير
مش هي دي الساقيه
اللي بنسمع صوتها ادان
نتوضي وبنصلي
في حوضها
وبنتغدي كمان
لا لأ مش هي الارض
اللي بتحبل ابدا
وبتولد نور
مش هو الصبح
اللي يوماتي
بيعدي السور
أو يطلع من قلب العتمه
ترقص له الشبابيك
والدوور
طب فين الفجر
اللي بمركب مليان
قناديل
طب فين الديك
اللي بصيح ويقول
مواويل
طب فين النيل
بيهز الأرض فترقصله
وتفتح له الحواويل
مش فاضل غير قبر
بيضحك وبتحضن درعاته
كل اللي بيطلع
م الدنيا قتيل
……………………..
