ليه حزينه – شعر عامية
ليه حزينه – شعر عامية
اشرف الشناوي
شاعر عاميه
البرامون
المنصوره

ليه الشتا
دق بابك وانتي
قاعده مكتفه
وشكلك حزين
كنتي دايما
تضحكي وتفرحي
وترقص شوارعك
رغم اوجاع السنين
شوفت توتك ياما غنا
والقمر بيضحك قبالنا
والحمام طاير دواير
والبيوت مليانه نور
شوفت نيل عمال
بيحضن.. كل ليله
في الجسور
شوفت طرحه بالف
فرحه تزرع الارض
اللي بور
شوفت خلق في
الابتسامه روحها احلي
من الطيور
شوفت ناس فيها
الاماني تعدي مهما
الليل دا عتمه
بالف سور
ليه حزينه والشتا
عمال يخبط عالبيبان
كملي يالا الحكايه
لجل مانحس بأمان
وافتحي القلب اللي عايش
رغم خوفه من الزمان
واضحكي يمكن نلاقي
حلم باقي م الطوفان
ليه حزينه والغنا
مالهوش مكان
…………… …….