لسه الحمام بيصلي – شعر عامية
لسه الحمام بيصلي – شعر عامية
اشرف الشناوي
شاعر عاميه
البرامون
المنصوره
وفي عز عز الشتا
بتلاقي ياما بيوت
يخضر فيها التوت
وتحس فيها براح
وبيوت تنام م الوجع
وتهد فيها جراح
وبيوت تلاقي الغنا
مرسوم علي الجدران
وبيوت ياخدها البكا
م الضحكه للتوهه
يقفل بيبان الرضا
ويرسمها ١٠٠ لوحه
وبيوت ياخدها الزمن
للذكرى والنسيان
تفضل حيطان الشقا
شاهده على السجان
وبيوت وفيها المدد
أوسع من الملكوت
مهما يدور الزمن
تفضل دفا ماتموت
يملا الحمام حجرها
ويغني ويصلي
ويهز توت فرعها
ياكل وبيحلي
يغزل خيطان المني
ويولع القناديل
ومهما كان رزقها
ترضى ولو بقليل
مهما يكون حملها
تلقى الحيطان بتشيل
وبيوت تشوف وشها
زي البنات البكر
مهما يدور الزمن
تفضل تقول الذكر
شباكها لو يتفتح
تلقى الضيا والنور
وعيون ماليها الفرح
ولا يوم بتعرف بور
ومهما خادها الوجع
ماتحس فيها بسور
………………………