عبسميع … عامية بقلم حسن أبو عرب
عبسميع
عامية بقلم حسن أبو عرب
فِك واتنِّى ياعبسميع
خَطَط الأرض الحلال
مَسَّح القُنيَان بفاسك
وابدر الخير والجمال
خلِّي ديلهَا زي راسهَا
واروِى بالميَّا الزُلال
احضُن الطمي بكفُوفَك
واعدل الحَد اللى مال
حاذر النَدل الوضِيع
واوعَه يوم تِحْوِد شمال
دا انت مصرى ياوِلد ابُويا
مصرى مابيعرف محال
خطى لصعابك وكَبر
زى ماعبَرت القنال
بكرا راح يجِي الربيع
بكرا تبتسم العيال
بكرا زرعك يملا غيطك
بكرا تتحقق آمال
عض ع الصبر بنواجزك
خلى عزمك كالجبال
عبسميع يا أمل بلدنا
أرضنا مصنع رجال
راح يفيض الخير حدانا
بالترابط والزمال
فاجعل الهمه ف يمينك
هز بإديك الهلال
هز بإديك الهلال
