نحيط سيادتكم علما – مونولوج

نصر سرحان طاحون

إن الدنيا اتلخبط حالها
وإن العالم صار مجنون
وإن القرد بقى بيتكلم
وإن الحلبة بقت كمون

الواد سيد بقى ياسمينا
وام سماح عملت شمشون
واحمد سيكا عامله ضفيره
ولابس جيبه فوق الكلسون
وإن الجاهل بقى سيدنا
وإن العالِم بات مطحون

حتى الأهلي ماخدش الدوري
فجأة الدرع طلع مسكون
والعفاريت منه بتتنطط
من ميت عقبه لغاية الجون

والأخلاق صبحت أنتيكة
مش بنشوفها في أي ماعون
لا بنتواصل مع حبايبنا
ولا فيه آسف ولا باردون
الاخلاق من عال انتحرت
نزلت خالص في البدروم

كل شبابنا بقى بيتمطوح
ولا فيه عاقل والا موزون
كله مسطح فوق شوارعنا
شمام بودرة أو آيفون

فاضل ايه بس في دنيتنا
ماتغيرش وصار ميت لون
كله اتغش وبقى سبوبة
ولاشيء ضامن أو مضمون
شوب القصب اللي بينعشنا
يوم ما بنعطش صار مدهون
حطوا عليه البودرة اتمكيج
أبيض منه مفيش في الكون
أما البن اللي يفوقنا
منفوش وشه – بالكربون

كله بيجرى ورا ترندات
جوه البيت أو ف البالكون
مش مطلوب منك تفهمها
شير بس على التليفون
يلا يا عالم فوقوا بسرعة
قبل ما بكره يدق الهون
واحنا في قلبه نبات ونفرفر
نصرخ جامد ولا فيه عون