ماتصدقشي – شعر عامية
ماتصدقشي – شعر عامية
وحيد علي الجمال
ماتصدقشي الشعر الأبيض
لو يوم عينك خبطت فيه
ولا كرمشة الإيد لو ظهرت
والوقت اللي في وشك علّم
واتسجل في خطوط التيه
إن العمر سنينه اتسحبت
ما فضلوش وقت يكفيه
عُدّ… واخصم في اللي ارتحلوا
واللي في لحظة ضعف انهزموا
واللي اتنسوا وفي غمضة عين
واللي في ذكرى وجودهم
فضلوا
زي الكحل في رمش العين
عيش العمر بمرّه وعسله
وامسح همّه وغمّه وأثره
أوعاك تبقى في سجنه أسير
قشر الفالصوا هيخطف قلبك
وينسيك فرضك مع ربك
وتعيش حلم جريح مش ليك
هي ساعات ماسكين عقاربها
مش عارفين والله مأربها
لو سرحت بنعيد ترتبها
لو وقفت ربك يعدلها
أيه راح يفرق بس معاها
لو قلبت في عاليها واطيها
ما يغركش المغرم بيها
واللي بيلعن كل ما فيها
خفف حملك بس وعدي
وانفض ايدك من بلاويها
د يابخت اللي الحظ ف صفه
اللي يفوتها.. لا له ولا ليها
