بفرش غنا وسط المواويل – شعر عامية
بفرش غنا وسط المواويل – شعر عامية
اشرف الشناوي
شاعر عاميه
البرامون
المنصوره
الفجر بص من الشباك
شبكلي قلبي بطرف غناه
وقالي قوم طبطب عالروح
كل الوجع ربك سواه
ضحكت وعدلت ملامحي
والصبح عدا طحن قمحي
والفجر مد ايديه بالنور
اتوضي وامسح بيه جرحي
وازرع غيطان حواليها التوت
واسمع غنا يهز الملكوت
اقول لنفسي ازاي هاتموت
وبكره جاي ومعاه الضي
والف بايديا سواقي
وابدر امل لو مش لاقي
افرش غنا وسط المواويل
وازق بايديا العتمه
واطير وانام زي العصافير
احلم بشمسه وصبح كبير
مافهمش سجن
وسور وغفير
……………………
