ولى – شعر عامية
ولى – شعر عامية
حسن أبو عرب
عدت عليك كام سنه
واقف فى وش الريح
صوتك بيصدح غُنَا
عاشق بقلب جريح
زاهد وكاره الغِنَى
وبتعشق التسبيح
عدت عليك كام سنه
تبنى فى جُسور وجَسور
بادر تقاوى الهنا
عايش بقلب جَسُور
دايما وحاسس بنا
فازاى تبان مكسور
عدت عليك كام سنه
دمك فرات سارى
تروى فى غيطان الأنا
وتروض الضارى
موتك وأجلك دنا
يا بو المقام عالى
عدت عليك كام سنه
وانت اللى لسه هناك
معانا مش ضدنا
سيدنا النبى رباك
بالحب تغزل لنا
فازاى فى يوم ننساك
عدت عليك كام سنه
بحدودك الممكنه
بترقع البسمات
وبذل وبمسكنه
تدعيلنا فى الصلوات
النور يسود حينا
ياصاحب الكرامات
عدت عليك كام سنه
نبعتلك السلامات
عايش مابينا ولى
حى وعمره ما مات
حى وعمره مامات
