نداغة و لبان – شعر عامية
نداغة و لبان – شعر عامية
وحيد علي الجمال
عايزة إيه؟
يا حلوة قولي..
عايزة حب
يكون مقاسي
نفس حجمي
ونفس طولي
فيه ملامح
من ملامحي
نفس حالتي..
شكله شكلي
طابعه طابعي
يبقى أبسط
م البساطة
حضنه يشبه
حضن أمي
ف الطيابة
شكل أبويا
لما أشوفه
قلبي يجري
أصله باستمرار
وحشني
إن لمَحني بيعاكسني
وينغشني
وابتسامته
بتحوطني
جوه نن العين
وواخدني
عايزة كل
شوية أبوسه
وإن ضايقته
في يوم بغيرتي
يبقى مستحمل جنوني
كل ما أزعل بيصالحني
وإن جرحته غصب عني
عارفة إنه هيسامحني
استحالة يوم يعدي
إلا وينادي: “حبيبتي..
أنتِ بالنسبة لي نعمة
شكرها شيء مش بإيدي
عمري كله لو يكفي
هو مني كله ليكي”
قولي تاني.. عايزة إيه؟
عايزة صاحب
يبقى ظهري
إن وقعت يكون
ضاممني
أشكي همي ويعاتبني
لو قسوة
الدنيا مالت
إيده دايماً ساندة كتفي
لو لقاني في يوم
في شدة
الوجع منه بيجري
هو من نظرة فاهمني
روحي مسنودة عليه
قولي تاني.. عايزة إيه؟
أحلمي… يا نن عيني
أي حلم هتلاقيه!
عايزة تأشيرة لـ بكرة
فجر راسم ألف فكرة
للحياة من غير دموع
عايزة شارع كله خير
السماحة فيه دليل
فيه بشاشة ألف ميل
بين وشوش الطيبين
تلقى كل الناس
بتدعي إن رزقك
يبقى نية تحفظك
في المخلصين
حُبهم هو الأمان
حتى لو غَدر الزمان
عايزة دين
بره المساجد
بالمعاملة
تبقى ساجد
كل لفظة فيها
عابد
للي سوى الكون
وخلقك
تبقى راضي
بالنصيب
تحمد المولى
في سماه
إنه سترك رغم
تقصيرك معاه
وإن لقيت شيبسي
ونايتي هات لي كرتونة
في إيديك
عايزة كل ده يا عمي..
وإن فِضِل
م الفكة باقي
هات لي قلبظ
شطة نار
وإن لقيت
مصاصة لوز
هات لي فرد
وهات لي جوز
وإن لقيت
في الباقي
باقي..
هات لي نداغة ولبان
