الله اكبر – شعر عامية
الله اكبر – شعر عامية
محمود عفيفي دومه
و بدون إنذار و سجاده لمفيش أعذار
ومنيش في قيام ولا وسطي رابط مئزار
أنا في الدار وفجأة صحيت
والدمع مندي وبيكرر لشيخنا أذان
على أقدام راحة تسعى نواحي الغيط
وصوت عصافير وعقدة النية للطيران
وناس صاحية في دي الناحية دعاها يا رب وألف يا ريت
وروحية وفتحية وهات يا رغي سندها الحيط
ع درويش وكام بدعة
وواء تترجى للرضعة
وصوت حنفية بتنقط بكام ندعة ملت خزان
وميت محمود وألف أحمد وكام مروان
سباق والكل متوضي لربه الفرض متقضي
على جدو بدماغ فضي وعكازه صديق وأمان
وجوايا متين نادم على اللي فات
(سي ڤي) مسجل ومتبوب وفيه صفحات
وأنا على الفكر متعود شوشو بيحوم ومتلود
بيزن في ودني ويقلب يجيب في آفات
استنى وصليها بكرة ربك موجود
والشوك في حرير
هاتسيب لدفاك ينعي لحظة وتخطي سرير
ما هي بكرة الأيام جاية وعمرها ما تطير
كسلت ثواني وطاوعته أشوف ابن الإيه
وهاودت لخناس وسوسته وعلى باب التيه
كريت لشريط جوا نافوخي طب ده معقول
السم أهو ساكن حدي عسله والقول معسول
وما بين خيارين أنا بتمرجح مين فيهم أنول
بستغفر منه وسوسته
سمعته معوذتي ولمسته
عفرت لوشه ولحوسته
وقومت أنا منفوض
هاتقوم وتصلي يا حيلتها ومفيش لردود
لبيت وبسرعة لندا ربي وجريت على البيت
ربك بمشيئته أهو نصرني ودعيت وناجيت
وحمدت ربي على كرمه وإني اتربيت
كان شوشو ماسك للبكرة وهايكر الخيط
والله أكبر!!!
