لخمة راس – شعر عامية
لخمة راس – شعر عامية
اشرف الشناوي
شاعر عاميه
البرامون
المنصوره
ابشركم
باني خلاص
بقيت بصباص
بقيت قناص
بقيت بصطاد
وفي الضلمه
واصلي بكم امام
بكره
واطبل زي تطبيلكم
وهاحكيلكم ياما حكايات
باني بلمسه من ايدي
بصحي اموات
واشق البحر ادامكم
ولسه آيات
واجيب الشمس
واطفيها
وكام نجمه اعبيها
في طشت غسيل
واحط صباعي في العتمه
واشق النيل
واشاور للحمام ينزل
كأنه قتيل
واجيب الصبح
من طوقه
وحبة ضحك من فوقه
وفجر ونور
مادام الحق مش قادر
يرد الزور
ولا يشيل الوجع
م الدوور
واعدي البحر والمالح
واسلمكم شجر طارح
من امبارح
وابشركم باني خلاص
كتبت لكم وفي القرطاس
هاتكلوا الباميه
بالقلقاس
بلا فلقه بلا دوشه
بلا خيبه
وقلبة راس
….؛………………..
