عصفور برئ – شعر عامية
عصفور برئ – شعر عامية
اشرف الشناوي
شاعر عاميه
البرامون
المنصوره
انا لسه جي…… انا لسه جي
بحلم معايا غنوتي وحفاني ضي
اضحك واداري في دمعتي
وكأني حي
والليل بيخطف في الغنا
ويهد في حيطان. البنا.
.. وبياكله ني
ويهز في فروع الشجر
يرمي القدر. فوق م الحريق
والبحر مل من البكا
على صوت زعيق
لا فجر بان ولا صوت ادان
ولا صبح بيسقي في الغيطان
يعرق ويتعب م العزيق
حبة امل جوا الوجع. زي الدقيق
هي الحياه من غير غنا
حتما تضيق…….. قوم وابتسم
واضحك وكمل في الطريق
انا لسه جي وقلبي عيل
مات غريق
ليه تحبسوا وتكتفوا
عصفور بريئ
……………………
