ونسيت الغنا – شعر عامية
ونسيت الغنا – شعر عامية
اشرف الشناوي
شاعر عاميه
البرامون
المنصوره
كان نفسي في ضحكه
تكون.. مش جايبه وراها
جراح أو حتى انين
كان نفسي اكمل
بس السكه
والاقي في عمري
اماني وحلم وناس
عايشين
كان نفسي الفجر
يعدي معاه الصبح
في ايده الفرشه بيرسم
في البساتين
كان نفسي اكون
عصفور بيطير
ولا اكونش في يوم
مخلوق من طين
وياريتني ماكنت
في يوم م البني ادمين
كان نفسي يكون لي جناح
واغني براحتي والف
وادور جوا الملكوت
واتعب وارتاح
وياخدني في حضنه
التوت
كان نفسي اكمل
حتى ان شاءالله
ساعات واموت
ملقيتش امل ولا حتي
الشمس تزق الباب وتفوت
والليل بيهد الحيل
وبيرمح فوق الدوور
وبيبني لكل الخلق قبور
كان نفسي اعيش
من غير زنزانه وسور
واشوف الضحكه
بترقص تاني في قلب النور
فنسيت الغنا ونسيت
اننا من غير حلمنا
عايشين كلنا
على أرض وبور
………………………
