أرجوك – شعر عامية
أرجوك – شعر عامية
حسن أبو عرب
قلبى اللى عاش
طول عمره خام
حكموا عليه بإعدام
من شوق كواه وغرام
قلبى اللى معجون بالسلام
زى المطر عاشق السحاب
عشق الجدور للتراب
عشق السطور للكتاب
عشق الشفايف للكلام
قاطع حِبال الود ليه
ووخدنى وياك جوه تيه
طب قلى بس عملت ايه؟
يا ابو العيون رمشك سهام
بتعلى ليه وبتبنى سور
قلبك ولا قلب الصخور
انا لك فنار وعيونى نور
شعاع وشاقق للضلام
لملم حطامى وجَمَّعُه
من قلبى قرب واسمَعُه
همس القلوب ما أروعُه
مانا قلبى للعاشقين امام
بحر الوفا طارح دموع
للتوبه حانن والرجوع
ع الشط آيد لَك شموع
قلبى وقلبك جوز يمام
رقيق كنسمات الهوا
لمسة ايديك بلسم دوا
فان كنت ناوى
على الخصام
أرجوك .أرجوك
أرجوك تزورنى
فى المنام!!
