انا شكلي عجوز ، لكن قلبي – شعر عامية
انا شكلي عجوز ، لكن قلبي – شعر عامية
اشرف الشناوي
شاعر عاميه
البرامون
المنصوره
مين قال
ان انا قلبي عجوز
وانا قلبي بيعشق بالجوز
وبرغم ان سنانه دي هتمه
فليلاتي يكسر في اللوز
انا قلبي عيالي وبيتعفرت
وبيبكي ساعات ايوا حقيقي
وساعات بينط وبيزغرط
وساعات بيشيل سيف ويحارب
ويعدي المالح بالقارب
وساعات تلقاه زي حرامي
عمال يتلصص ويراقب
وبيخطف افراح م الدنيا
بيداري بكاه وفي احزانه
وبيرسم من حلمه بيوت
وبيضحك من وجعه يموت
وساعات تلقاه زي المارد
وساعات بتحسه دا هلفوت
قلبي العصفور الاخضر
زقزق
م الفجر بيطلع ويدقدق
فوق م الشبابيك
ويداري الامل
اللي فاضله
بغناه الشيك
بيغني ويفرد في جناحه
وبيحلم في الكون وبراحه
ويطير عالدوور
ويصحى الخلق النعسانه
لغيطان النور
انا شكلي عجوز
لكن قلبي….. مافهوش ولا سور
……………………….
