بواقي السور – شعر عامية
بواقي السور – شعر عامية
اشرف الشناوي
شاعر عاميه
البرامون
المنصوره
وليه خايفه
من المجاريح
وفايته الريح
يهز القلع والنخله
ويرمي التوته بالوحله
وليه سايبه الوجع
في الدار
وفايته الصبح
بيغني مع النوار
وجايبه الفجر من طوقه
كأنه حمار
وليه سايبه الأمل محتار
مابين الجنه والآخر
يخش النار
وليه فايته الوجع فينا
بينهش كل مالينا
ويفتح جرح ويسلم
خيطان الضي
لقبر بياكل العتمه
وعضمي الني
وليه راضيه بشنق النور
وخايفه تهدي بايديكي
بواقي السور
دا انا العصفور
يوماتي بادوور
واجيلك عند شباكك
واغني لك يروق بالك
ودايما كايده عزالك
وليه خايفه من المجاريح
وفايته الريح
يلم الورد م السكه
ويعمل م الوجع افراح
فسيبي الحلم
لو لسه مكان وبراح
وسيبي الغنوه نعملها
ادان وسلاح
وسيبي القلب من عشقك
في يوم يرتاح
………………………..
