الشاعر النرجسي – شعر عامية
الشاعر النرجسي – شعر عامية
وحيد علي الجمال
الشاعر النرجسي
ليبرالي أو ماركسي
لو مرّة زار صفحتي
وكلامه طال معدتي
يطبّق على فِشّتي
ممنوع تبان ضحكتي
دايمًا أنيق، شِفْتَشي
بيزقّ، لا بيختشي
إبداعه لا بينشري
ولا له زبون يتباع
بُمبة على فحلوقي
ومكسّرات فسدقي
التوفي لو تشتهي
ملفوف بتوب سلوفان
كل القصايد رادي
وكاتبها مش أسطى جي
في الشكل لا ترتقي
أحسن تقول عفيجي
أبدًا ماهوش فنان
الشوكة والسكينة
شايف في نفسه الحِيلة
ماسك، وإيده بخيلة
يمدح لغيره قصيدة
ويقول عليها جميلة
فيردّ فيه الروح
دايمًا قليل البوح
صوته تقول مبحوح
الغمّ منه يفوح
وتقوم تقول مجروح
ساكن في تخشيبة
برج الغرور عالي
منفوخ على الفاضي
يعمل عليك قاضي
لو شوفته في المجلس
خليك بقى محسن
أوعاك هناك تركن
في الشعر لو مجرم
هتبان صحيح معدم
وبطعنة تعدم
لمصيرك المحتوم
الشاعر الهجّاص
ماشي في قصايد الناس
ويقصّ منها الماس 💎
يملا له كام قرطاس
وكأنه ضمّ دراس
يعزق كمان بالفاس
ويشخبط الكراس
ويلزق الأحداث
يشرب في مدح الناس
ويبان كمان أستاذ
وهو من الأنجاس
المبدع الهجّاص
ده حرامي لا قنّاص
عاوز له طلق رصاص
أكل حقوق الناس
