من غير وطن ازاي نعيش – شعر عامية
من غير وطن ازاي نعيش – شعر عامية
اشرف الشناوي
شاعر عاميه
البرامون
المنصوره
حط النقط
فوق م الحروف
ليه الحياه بنعشها خوف
لو نبتسم
الحزن هايسيب المكان
والحلم من غير الامل
مالهوش أمان
بكره اللي جاي وبضحكته
يفرش في نوره وسكته
والفجر من غير الادان
ازاي يبان
والصبح لو مل الطريق
كل الوطن يصبح غريق
ولا زرع يكبر في الغيطان
والشمس لو عشقت تدور
زي السواقي لأرض بور
وتصحي كل الميتين
وتدفي في كفوف
الحيطان
حط النقط
فوق م الحروف
تلقى الكلام زي الحمام
شايل غناوي بروح زمان
تلقى الندى بل الورود
تلقى الغنا زي البارود
بيلجم الصوت الجبان
من غير وطن وازاي نعيش
وازاي نطير من غير جناح
لو ايدنا مش ماسكه السلاح
يبقى الوطن أصبح مباح
نلبس طرح
ونغني عالورد اللي راح
حط النقط فوق الحروف
تلقى الوطن مليان
براح
…………………..
