برد وسلام – شعر عامية
برد وسلام – شعر عامية
بقلم…عبير عبدالمنعم
ساعات تروح الذكريات
من جوه تفانين الخيال
وساعات شيطان الشعر
يبقى؛ مختلف
يجي السؤال!
سوا نأتلف
أو نختلف ..
الفين محال..
أيوه محال اسمح لبعضي ويا بعضي
بالكلام أو بالمشورة والسلام
كان يا سلام!!!
ماشي على ضهر القصيدة
بألف فكره كل يوم
لحظة جنون قايمه تقوم
الفكرة
شايله مستحيل
ساوم على لحظة أمان
وبكل ضعف العمر كسبان الرهان
مين اللي باع واللي اشترى؟
حضرة قصيدتك ألف عمر !
(أنصت لها)
أو صدها !
(حيٌ ودادك فانتبه إن القصيدة من ندى)
محتار على خد العبير
والحبر معصوم م القلق
الكل شافك گ الولي
قوم وانجلي
واطرح سكاتك ع اللي باعك في المزاد
ومعاك ودادك والمداد
قول المدد..
الفكره سابقه خطوتك
والدمعه سابقه شكوتك
لو شوفت طاقة القدر
أوعاك تخاف
لتموت فطيس
يرموك على كوم الزمن
عافر كدا وانصب مقامك وانت حي
واملك زمامك الله حي
وابدا قصيدتك من جديد من غير ركش
من غير شموع وفتيلها روحك والوريد
خليك بعيد جنب النجوم تلمع عيونك في السما
أنت الولي..
إنجاز طحين الأرض في الزمن العفي
وحفيد طمع
وابن الهوى
مسكون بنورك بس نارك نادى فيها ربها
برد وسلام
