نفس الطريق – شعر عامية
نفس الطريق – شعر عامية
اشرف الشناوي
شاعر عاميه
البرامون
المنصوره
نفس الطريق
نفس المكان
نفس اللي كان
هي البيوت نفس الحيطان
بس اللي ضايع مننا
لحظة أمان
كنا زمان نحلم وكنا
ساعات نطير
كنا بنرسم حلمنا
ويضمنا اوقات كتير
ايه اللي ضاع غير عمرنا
وليالي حلوه في حبنا
مافضلش غير قسوه وفراق
وقلوب تموت بين الدقايق
في اشتياق
معقوله دا كان حبنا
ضحك ورياء
نفس الطريق
نفس المكان
نفس الغنا نفس الكلام
هو الشجر هو اليمام
هو القمر وسط النجوم
عمال بيسأل عننا
من غير لزوم
ورجعنا تاني لوحدنا
في نفس المكان
مالقينا غير بس اسمنا
سايبه الزمان
راح الغنا وسط البكا
والحب هان
كبرت جراحنا في عمرنا
قبل الاوان
فمشينا خوفنا يهزنا
نحلم بشوقنا وحبنا
بعد اللي كان
…………………..
