غربل ضلوعك – شعر عامية
غربل ضلوعك – شعر عامية
وحيد علي الجمال
غربل ضلوعك
وانفض الوجع القديم
خلي أغصانك تشيلك
قبل شقشقة الربيع
اوعى حلمك يختفي
منك يطير
يدبل الورد الأسير
جوه زنزانة خريفك
ينطفى شعاع الحياة
لما فجرك يبتدي
منك يضيع
قبل ما تفارق كابوسك
ينكسر مركب رجوعك
جوه نواة الشرود
تلعن المر العنيد
لما شمعك ينتحر
لجل أسراب الطيور
تشرب النور الحلال
بين كفوف الشقيانين
عند فجر الطيبين
اغسل خدودك بالندى
قبل ما تفتح جفونك
اوعى أحلامك تخونك
خرج التنهيد بصوت
وارفض الضحكة تموت
مهما حاولوا يغتلوك
شرنقة ضلمة سحابك
شايلة أحلام الشروق
رافضة أحزان الغروب
هو ذات نفس الطريق
كل قضبانك حديد
سجن أوهامك فَلَت
حبل مشنقتك حرير
وإنت متعلق ضرير
فوق سطور حبرك نزف
ضحّي بالحرف الجبان
مهما كان قلمك جعان
خبّي سرك في الورق
وانسى أوجاع القلوب
عدّي شط المستحيل
وابني جسرك في الأمل
قبل ما يهدّوا الرصيف
بكرة لازم يتولد
من غير شروط
بكرة مش لازم يموت
عطّلوا إشارة المرور
خلّي شمسك تسبقك
قبل نوبات الجنون
