شوارع حزينه – شعر عامية
شوارع حزينه – شعر عامية
اشرف الشناوي
شاعر عاميه
البرامون
المنصوره
هنفضل ننادي محدش سامعنا
ونفضل نداري ليلاتي
في وجعنا
تعدي الاماني وشمس النهار
ونحلم بضحكه وطعم انتصار
تاخدنا الهزايم لباب الانتظار
نشد اللي فاضل ونركب صنادل
في نيل المتاهه
ونقعد نشاور عشان صبح يجي
نصلي ونسجد بحق وحقيقي
ونرسم وشوشنا ناقصه الأمان
ونسمع خلايق تنازع وتصرخ
نقول دا الادان
نروح جوا حبه تاكلنا الحيتان
ننادي ماحدش بمركب يجينا
ولا بر باين ولا حتى مينا
نداري اللي فاضل
في كل اللي لينا
نشوف الملايكه وفوقنا تنادينا
فيخطفنا صوت الحياه في المدينه
نلاقي الشوارع بناسها الحزينه
فنرجع ونرمي القلوب في السفينه
ونستني بكره يمكن يجينا
بحبة اماني لو مستحيله
ونزرع غيطانا
بحبة نجيله
……………………..
