مشاعر مزيفة – شعر عامية
مشاعر مزيفة – شعر عامية
وحيد علي الجمال
ألعب بمشاعرك ومشاعري
خليني أتجنن كده وأغلي
وأحلم بعيونك تكرهني
من غير ما ضميرك يشفع لي
ويدافع عني ويحكم لي
يثبت لك ظني في أفعالك
إنك مجنون
ما هو لازم قلبك هيسلم
والضحكة هتطلع وتعلم
في جبين الموت
أنا سهمي في لحظك مكسور
على سرك واقف مشطور
وحنيني في قلبك مبتور
كان نفسي أحبك في النور
ولا يفضل خايف مجرور
من بعدك عايش مهجور
بهمومك فارش في السوق
بهمس لك نايم مخنوق
طول عمرك عايش مسروق
اخرج واتحرر م الطوق
درويشك طلّق أوهمك
وخرج من خلوة أشعارك
والجرح أهو سابه على كتابك
متغطي ببردة أحلامك
وسطوره انصلبت على بابك
بيعد ويحسب في غيابك
حوشت في كدبك سنتين
وكتبت في عشقك دواوين
مستنيك تسكن الاثنين
أتاريك غيرت في عناوينك
ولا فاكر عهدك وكلامك
وهي قصة ودخلت أفلامك
بكره هتنساها وتصفالك
الكدبة الجاية هتحلالك
العرض هيفضل مكشوف
عايش من قلبك مخطوف
الماضي في ليلك هيطوف
وهتبلع ريقك م الخوف
وهتفضل واقف مكتوف
ويسامحك وأنت المكسوف
الوجع الماسك في الجوف
لك وحدك نازل موصوف
ولا عنك أبداً مصروف
والباقي في عمرك هتعيشه
على كهفك عايش مكهوف
تبكي ولا يطلع لك صوت
