تع نشرب شاي – شعر عامية

كان نفسي تقول عدّي عليّ

وتشد وتمسك في إيديا

تحلف أيمان الملاغية

ترمي في أشواقك كذا مية

قبل لما نخطي الزراعية

والولعة في جمرتها قوية

ويمين الحر على الشارب

نفتح له الباب ولا يتوارب

أمر المحبوب ديماً غالب

…. تع نشرب شاي

أحكيلك عن نفسي شوية

وازاي شقيت الجلابية

من نظرة عينك في عينيا

ولا كان على بالي وف النية

قلبي المخطوف من أفعاله

ولا خل يطبطب بحنانه

تتشقلب حالته وأحواله

يتحول عشّ وبنية

ويطير ويرفرف بجناحه

يغزل ف الليل فجر صباحه

يتمشى في ساعة عصرية

دَوّقت القلب الحنية

لو طيفك فات ع الضهرية

يزعق ف السكة القبلية

….. تع نشرب شاي

قربت أحكيلك على سري

بتأنس بيكي أمّا تطلي

وكأني أنا شوفتك بالتَّولي

أنا خدي برمشك متحني

يا جميل الوصف أنا مستني

ساكن ومربع في النني

هعملك حفلة من الآخر

تشهدلك بالحب الفاخر

الحسن في حسنك يتأخر

…… تع نشرب شاي

راح أحارب كل الفرسان

وأهزملك كل الشجعان

وانصب قلبك على قلبي

ويكون سلطان

ولا غيرك يسكن مملكتي

أمرك فرمان

تكتبني في دفتر أشعارك

ده حرملك بيت السلطان

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى