عرفتيني ؟ – شعر عامية
عرفتيني ؟ – شعر عامية
محمود عفيفي دومه
انا الواد ال كان امبارح
بيحبي وكفة في ترابك
انا چينك وانا عينك
وحقيقة تمحي لسرابك
أنا مالك وانا ال مالك
ولاعمري ماكنت اجير
وانا انتِ وانا حالك
وانا الفاحت ف رملك بير
عرفتيني!!!
بتفاصيلي وبملامحي
وتأصيلي بلون قمحي
كده شبهك ماانا وادك
وانا زادك ماانا منك
أنا ملاكك وانا جنك
ولاعمر الزمن يمحي
ياست الكل ياملكة
أنا دنياك والتركة
ياساكنه القلب ومشاركة
ف تكويني
سنين الغربة تكويني
بنام أحلم بحضن حنان
يضم يلم يأويني
عرفتيني !!!
ده انا موجك وانا النوه
وانا أدم وانا حوا
وانا ألبـسة وانا العوة
وانا طوق النجاة ف الطوف
في لحظة خوف
عرفتيني!!!.
انا اسمي ف ورق بسمك
أنا الحلفان وانا قسمك
وصورتي مزينه بنسرك
انا توتك وانا بيوتك
انا الترعه وانا جسرك
مشاركك ف الورق والدار
ما انا مقاسمك
عرفتيني!!!
لعدلك ابقي سيف بتار
وقيراطيني تسد ترد
تقابل غدر ميت هكتار
لا كلت يوم ولا تنهد
ماانا ليلك والف نهار
مفيش عندي اسامي تخض
انا العاشق ال لو يغضب
سونامي ف المحيط ينهار
انا ساعه ماتيجي النار
اكون بدرك واكون صدرك
وابقي سهمك الجبار
عرفتيني!!!