هاتلقاني! – شعر عامية
هاتلقاني! – شعر عامية
محمود عفيفي دومة

ف أمس ف بكره ف الآني
ف همسه صبح بتهفف
ع الشباك
ف ضحكه جارفها موج عاتي
تخطي شباك
ف نسمه ضل عصرية
وليله صيف
ف فنجانك ف كوبايتك
ف أيها كيف
ف طعم الحلو ف شفايفك
لحلو تضيف
ف صورة ورد ف الڤازة
ف صفحاتك
ف همسه قالتها غمازة
ف سكره ف سهاري الليل
لاكاس فيها ولا ازازة
ف صوت عصفور ع شجرة
تطل عليك واهي قبالك
وتعزف لحن علي وترك
وحاضنة بحب لحبالك
وانك نفس حال اني
ظنونك كربنة ظني
كما انت انا ذلك
وتلقاني
ف لون فستان وفيه شوفتك
وقولت الله
وعودك ال طارح ياسمين
زانه وحلاه
وترمي للهوي شالك
ف حرف قولته يوم عنك
وكأن كان ناسية ( مالك )
وكان آني
هاتلقاني! هاتلقاني!!!