أمشير – شعر عامية

بقول شكرا لكام واحد

سواء طيب سواء شرير

وصافي النيه او جاحد

صادفنا في خطاوي السير

ملون النوايا غيام

سبع الوان وغيرها كتير

بقول شكرا!

لناس كانت لروسنا تاج

لناس الرغي بالإنتاج

وناس تاهت في وسط امواج

وناس شرابة للطراطير

بقول شكرا!

لناس بتشوفها ف الطيب

وناس عملتها براني

تايهه وخيرها متغيب

ومحتاجه اكيد تغير

بقول شكرا!

لناس ف الغيبة بتعيب

وناس للظن بتخيب

وناس مالهمش ف الطيب

وف اخر أرار للبير

بقول شكرا وانا آسف !

انا كنت صافي النية

ومسالم وعامل شير

لقيت اسمي جاهز للحذف

علي لوحة وبالطباشير

خذلتوني!

مفيش فيكم لحامل مسك

ومتوفر لنافخ الكير

فارق خيركم مفيش عودة

قلوب وبصدر برمودة

لا فيه بيعوم ولا بيطير

رميت الهم كام طوبة

وعافر لجل اطوي الزيف

مفيش نسمه ولو نوبة

تيجي تمحي أكتئاب في خريف

تجيب كل ربيع ولى

تزيح عني رياح امشير

ليكم شكرا وميت شكرا

وانا آسف ومنها كتير!!!

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى