هانعيش دراويش – شعر عامية

مش باقي في قلبي
الا الموال
على كام حدوته
بطرحه وشال
على حلم بيطلع
م الغرابيل
بيزق في عتمه
ويرمي الضي
وبيبدر غيط
مافهوش قناديل
فبيطلع عود ياسمين
في نجيل
مش فاضل جوا
عيوني براح
وطريق مليان
بدموع على ملح
وجراح بتهز الروح
وتشيلها
وتجيب الفجر
وترمح بيه
وتخبي الشمس
في كم عباتها
فنطير من خوفنا
نروح مانجيش
ونتوه في الكون
ونعيش دراويش
ولا توته نهز ورقها
نداري مكان الريش
فنبات في الطل
ونصحي نلاقي
ملايكه بتنده
مانعديش
نرجع من خوفنا
نلاقي حاجات بتموت.
وحاجات تناتيش
فنلم العمر اللي باقي
ونرجع نحلم يمكن
نلحق حبه نعيش
…………………………

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى