عشنا وشوفنا – شعر عامية

.

عشنا وشوفنا حكاوي كتير
ناس من خفة روحها تطير
تضحك تلقي الدنيا براح
شوف ضحكتها تقول عصافير
زي الصبح بيرمي في ضيه
زي الشمسه في يوم امشير
لما تسيبك بس وتمشي
تهبط روحك م المشاوير
ناس طلتها الصبح مندي
شايل نسمه وشوق وعبير
تغسل روحك من اوجاعها
ترجع زي ماكنت بصير
ناس عكازك وقت الحوجه
ومهما يكون الحمل كبير
تقسم لو محتاج لقمتها
وتقسم حزنك لو قناطير
عشنا وشوفنا حكاوي كتير
ناس بتبيع وتهون العشره
وتملا حياتك بالمسامير
لو فرحان تزعل تتنكد
لجل ماترجع تاني البير
كل املهم تفضل واقف
اه لو مره شافوك بتطير
يجروا قوام ويقصوا جناحك
ويموتوا كل العصافير
يفتحوا باب احزانك تدخل
تنهش قلبك م التفكير
ناس من جوا
سواد على عتمه
باينه وشوشهم م المانكير
……………………..

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى