حيلك! – شعر عامية

ومين غمق ليك الدنيا

ومين عطب رجول خيلك.

ومين غيب طلوع فجرك

ومين عاشق ضلام ليلك

وليه زمرك ماعاد يطرب

ومين هد لعزيم حيلك

وده سؤالي وليك بسأل

فقدت الرد يا ويلك

ماتكونش لسه بتآوح!

وفاضت الرغبة من كيلك

وتاهت الدفة ف مراكبك

و بتواكبك حمول شيلك

ما تقولي ياعم صارحني

زمن قاصدك مفيش غيرك

بيتسابق مع حظك

وقاصدك دون عن جيلك

سامع همسك مدمعني

بقيت مشغول وبيك معني

ياعم ثانية اسمعني

وليه انت! ولا بديلك!

روح جرب لناس تانية

وأرسم دنيا غير دنيا

فيها بسمه وقلوب حانية

روح روض فيها طيرك

هاود عاود تاني وجرب

وعس قبل ماتقرب

بقلبك اطعمه وشرب

وارسمله خطوط سيرك

يقين ربك يكون جابر

ياواد اسمع أنا خابر

من الدنيا وعلي منابر

لو صابر!!!

تنول خيرك !!

ياعم روووح!

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى