قيامة نخوتك – شعر عامية
قيامة نخوتك – شعر عامية
بقلمي معوض حلمي الفلاح الفصيح
منشأة بطاش تمي الأمديد دقهلية

قابلني عنتر في الخلا
والدمع سايل م العيون
بيقولي شداد افترى
وعمي مالك مش حنون
عبوا القبيلة ف عبهم
وامي اللي شايله همهم
خلوها جاريه عندهم
وانا إيش أكون
أنا قلت أمك ساكته خوف
سيباك تحايل ف الظروف
ولاليها جاه ولايحزنون
عارفاك بأنك قدها
عاشق لعبله وندها
وعماره طالب يدها
ولغيرك انت لن تكون
وانت اللي صيتك ملحمه
حامي القبيله والحمى
وصوت زئيرك في السما
يملى الأعادي بالجنون
لو زاد عقول أهلك وبا
هاتقوم قيامة نخوتك
وتهد فوق راسهم حصون
وتوضي أمك م الغبا
وتخلي شداد أرنبه
وترمي مالك ف السجون
………………………………………