صحيح بتشوف؟ – شعر عامية
صحيح بتشوف؟ – شعر عامية
محمود عفيفي دومه
اما ان كنت صحيح بتشوف!
طيب شايف نفسك فين!
فوق التل وتحته حروف
بين الزينه وبين الشين
ممكن مره تبقي حاسسها
بعيد عن عينك و لالمسها
ولا غشاوة بغمة لابسها
والصبار عطشان ف السطر
طعم الكلمة في مر غمسها
وبتتناسى . اخرك . متر!!!
ولا يكون الحلم اختل
فاتك مل وراح القطر
طبطب ليها وخليك شاطر
منك واخده يجي ميت خاطر
أنك وسط الملح غرسها
لساها سارحة مين يآنسها
ولا الحرف وسطره اتسل
.مش هاتخاطر ان تراضي
وانك ترمي سلامك ليها
تكسب نفسك تبقي البادي
ولا تصهين وتعديها
وتقول عادي
سامع صوت العقل ينادي
لساه عايش ولا احتل
انبش . الحق .روحك . هاتها
وجه نظرك شوف لفنار
حاول تبعد من ده الغار
طب مين غيرك راح يحرسها
روح اغرسها.
في حضن خضار
خدها بعيد وابنيلها عمار
عمر جوا القلب لدار
ارمي بذور العفه سياج
حاوط ليها بالف جدار
اكتب عايش ولسه بفكر
خير قلبك أيه يختار
ولا الرمش بدمع اتبل
غاوي يسبل قلب صراع
حاول تاني
ارسم سطر بحبر اماني
دخل كهفك اي شعاع
وسكر يومك
كام معلقة ع عود نعناع
ارمي لباكو
فيه همزاتك علي لمزاتك
انقذ ذاتك من الاوجاع
واحفظ مبدء لو ف الخل
واطلع تاني فوق التل
وشوفك فين!!!
امحي الشينه وخلي الزين
شد لروحك
طبطب ع الباقي من بوحك
اشفي جروحك ودع خوف
ونادي لقمرك خليه يهل
ده لو كنت صحيح بتشوف!!!