الليل بيرمي الشبك – شعر عامية
الليل بيرمي الشبك – شعر عامية
اشرف الشناوي
شاعر عاميه
البرامون
المنصوره
ياعمر عمال تجري وتهز في الأحلام
مش كنت حبه تسيبا نضحك ولو ايام
حتى البكا والشقا عالارض من كام عام
لا ضحكه عدت لنا وسط الوجع والام
ضاع الغنا مننا مافضلش غير اوهام
ياعمر فين الأمل
والصبح ماله مكان
والفجر عاش وسطنا
وكأنه يعني ماكان
ياشمس فين الدفا
قلب الجدع بردان
مين اللي عاش زينا
تايه مابين جدران
ياقطر هدي الخطا
نرتاح من الاحزان
يمكن نلاقي الرضا
فنعيش به حبه كمان
هز الهوى في الشجر كسر فروع التوت
وفضلنا رغم الوجع نحلم ونشبع موت
نفرد جناح الأمل ونبص عا الملكوت
نلقي النجوم والقمر
نايمين في بطن الحوت
والليل بيرمي الشبك ويلمنا بجبروت
ويرمينا تحت الشتا يمكن نلاقي بيوت
نقعد نكمل غنا قبل الحياه ماتفوت
………………………