ألف عين – شعر عامية
ألف عين – شعر عامية
وحيد علي الجمال
اِمْشِ وارجع خطوتين
واكتب الحرف بضمير
خُد نَفَس من قلب روحك
وانفخه ينظف جروحك
روح شمال أو روح يمين
مش مهم في حزب مين
المهم تكون سليم
واِسبق الليل الحزين
خلّي حرفك نصله حامي
مش محامي الكاذبين
اللي يزعل من كلامك
واللي يتمنى سكوتك
هما فعلاً ملطوطين
من ذنوبهم موجوعين
فوق دماغهم ألف طين
أربة ذل وأربة شين
حسّوا بيهم مخرومين
شيل وحمّل كله دين
مهما عمرك كان طويل
لملم الدنيا في زكايب
عوّض الحرمان سنين
أنت فعلاً كنت غايب
لما قسّمنا المنايب
شفت حظك كله شين
والمناب طالع سمين
لِمّ واجمع مرّ صبرك
واملا منه كف حجرك
خيل طموحك سيبه يمرح
الحساب هيكون عسير
جولة تخسر جولة تكسب
ظلم نفسك بكره يكبر
حبة حبة هتيجي رجلك
واللي كان شاكك في أمرك
ظنّه فيك أصبح يقين
مين بقى يقدر يسامحك
أعمى ماشي بألف عين
قولي مين يقدر يسدد
من ديونك ألف دين
اجري وافتح ألف باب
وارمي حضنك للكلاب
ستر ربك لك حجاب
مش هيفضل في العناد
أو في ظلمك للعباد
نفسي تصحى من الكابوس
فوق عنادك قوم ودوس
اوعى تغرق في الغباوة
أو تنسيك الدروس
العن السكة الشمال
الحياة مش جمع مال
اللي حمّل واللي شال
قبل منك راحوا فين
لو سيرتهم جت في يوم
بالمعاصي مذكورين
آخرة الدنيا وزينتها
قبر دوده لك قرين
واللي قدّمته في حياتك
راح تشوفه رأي عين
هو تحويشتك لبكرة
ليك لوحدك أو عليك
