إبليس – شعر عامية
إبليس – شعر عامية
وحيد علي الجمال
لو عَ الدنيا خدوها بحالها،
أنا مش ناوي أحاربكوا عليها.
مش علشان أنا زاهد فيها،
أو مستحرم أعيش في نعيمها،
أو مش قادر منكوا أحميها.
أنا قادر، وإنتوا عارفين،
رغم اللبس تعيشوا عرايا،
رغم فلوسكوا تبانوا مساكين.
أصلي شبعت أنا فعلًا منها،
ما بقاش فيها شيء يغويني،
أصلها تحت الجزمة تلين.
حمّلوا منها، وانهبوا فيها،
رغم قصوركم واللي سندكم،
جوعكوا فضحكوا بالملايين.
خوضوا في عرض الناس بالكدب،
واحلفوا إنكوا أشرف حزب.
بُكره حسابكوا ملهوش حد،
بُكره هيجمع بينا الرب.
شيل، واستقوى كمان، واتفرعن،
كل الناس عارفينك أرعن.
عمرك كله عايش متلون،
على مصلحتك تبقى الأول.
من عم نول وأنت قليل،
جواك حلم ضعيف متسول.
وإنت تاريخك كله ملوث،
شاهد فيك إنك متحول.
ولا بتصون العيش والملح،
وشك كالح، قلبك جلف،
وأخد أوسكار في التمثيل.
كل العالم فيك متحامل،
وإنت يا عيني كنت مجامل.
رغم ذنوبهم كنت وديع،
أنا مش قادر أمسك نفسي،
حاسس إني يا واد صدقتك،
جوه دموعي جرفني السيل.
لابس توب إبليس ذات نفسه،
إبليس حتى ما شفناش وشه،
لما بشوفك كأني أنا شوفته،
بتعوذ، وأرقي الموجود.
الأصعب واللي أنا مش فاهمه،
إن الكدب واخد فيك حقه،
ومصدقه يا غراب البين،
إنك بينا ملاك بيطير.
