احلم بايه – شعر عامية

احلم بايه – شعر عامية

اشرف الشناوي شاعر عاميه البرامون – المنصوره

احلم بايه
وانا عمري كله بزمتك
بارقص باليه
انا مين قوليلي بزمتك
وبدين ابوكي انا اسوي ايه
عجبك قوي مني البكا
والا الصريخ
شقيت هدومي م الغبا
وتعبت من طول الغنا
دي مش سنه
دي سنين كتير متبعتره
فوق م السكك
هديتي حيلي م الوجع
اصلب في طولي
أوام باقع
نفسي احس بضحكتي
وسط العفار
وارسم امل فوق سكتي
مليان خضار
واحضن في روحي
وابتسم من غير مرار
أو الاقي في العتمه
امل جاي بالنهار
أو احسني طاير بعيد
مليت انا من ركنتي
فوق من رصيف الانتظار
احلم بايه واللي فضل
من ضحكتي أو دنيتي
في ايدين ملايكه بجهزوا
علشاني نار
انا راضي بس بزمتك
لو يعجبك.. قولي القرار
هافضل كدا ميت
في حضنك ليل نهار
والقبر رافض جتتي
ولا ليا دار
………………….