افهم – شعر عامية
افهم – شعر عامية
مسعد البحراوي
حبيبي وصاحبي واخويا
يااجمل حاجه حصلت لي
رسالة حب لك مني
تعيش دايما بخير وسلام
حابب تعرف بأني فداك
يآرب تبادلني ياصاحبي الشعور
واشوفك بخير تشوفني معاك
ويكفينا دايما شرور الغرور
روحي اتأكد بأنها لك
لا يمكن وأبدا ماتبقى عليك
مادد لك ايديا فأبسط إيديك
وعيشني جنبك في حب وأمان
ياراجل أمان
امانك أماني
فاقرا حكايتك وادرس القصه
فتح نفوخك وافهم المضمون
رب الخلايق قال لك اتوصى
ياأخويا باهلك
كن السند والعون
ينفع نحارب اخ علشان اخ ؟!
ونقع في قاع المعصيه والفخ
طب مين يطخ ف مين ومين ينطخ
ومين يموت كشهيد ومين يموت ملعون
فتح نفوخك يابني واوعى تشيل
اوزار قابيل
ولا اللي رموا يوسف في قاع الجب
لا هتغني عنك كثرة المواويل
ولا مال قارون هيفك عنك كرب
افهم
الحق حق وأحق أن يتبع
داوي الجراح وبلاش تزيد الوجع
ارجع لربك وانسى أهل البدع
دُول شقلبولنا الكون
قوتنا يابني عشان تصون الوعد
وتجيب حقوق أهالينا واحبابنا
ولبعض نزرع ورد مروي بود
نزرع لأهل الشر الغامنا
إفهم
بيوقعونا ف بعض
بيحرفولنا الوعد
مايصيرش نتجرجر
فكر ياواد فكر
هو انت مين لو جار عليك الزمن
مزاجه يتعكر ويمد لك ايده
غير اللي كان منك
عربي انت وانا عربي وكل العرب اخوه