العَوَاف – شعر عامية
العَوَاف – شعر عامية
محمد سيوفي
كل الظروف متجمعه متفقه تضرب في الوتين
والضربه جامده مسمًعه تلوي دراع اتخن تخين
وانا ضحكتي واصله السما
مع ان كرابيج الشقا على جتتي رسمت خريطه مُجسَمه
ودليلها شامه فوق جبيني معلِمه ومقسِمه
تشهد تقول هذا الجدع أصلي ومتين
جدع ابن نكته وصحبته اصغر ما فيها معلمين
صك البراءه في ضحكته ولا كانش ضمن البياعين
عايش بنهج الطيبين
يتمنى يوم المرحمه ياخد كتابه باليمين
خارج طابور الطبالين والإمعه
أول صفوف المغرمين في المعمعه
والحلوه بلحه مقمعه واخده الشمال بدل اليمين
في الحضن جمره مولعه
ترمي السلام متدلعه
وبتقول عَوَاف
يا مصدقين الستر وقت البرد يبقالكم لحاف
يا مرطبين الحلق باللقمه الحلال رغم انكم بلعينها حاف
يا ناس نضاف
يا مغربلين القهر
ومدلعين المُر
يا معلمين الصبر يصبر على الحلم المُحال
خالتي من بعد السلام بتبوس خد العيال
وتقول عَوَاف
خالتي بتسلم عليكوا وبتقول عَوَاف
القوّال سيوفي
