بقرة حاحا – شعر عامية
بقرة حاحا – شعر عامية
اشرف الشناوي
شاعر عاميه
البرامون
المنصوره

بقرة حاحا لبنها صراحه
مغذي جميل
تملا الطاجن من غير حلب
لشعب نبيل
ناس بتربرب ناس بتهبهب
نفسها تشرب م البرميل
بقرة حاحا مش نطاحه
ولا نواحه تلقى لبنها
مالوهش مثيل
واقفه ترضع نايمه ترضع
تحت بزازها كلاب زناجيل
تلقى كروشهم زي وشوشهم
سده النيل
بقرة حاحا عامله مناحه
بقالها سنين
لما شربنا ودوقنا لبنها
جات رفستنا ياعم امين
بنأكلها وبنحميها
يوم مابنحلب ينزل طين
بقرة حاحا مش مرتاحه
بكل صراحه مع المساكين
قطموا قرونها مصوا عروقوها
نزل الدم في غمضة عين
سألوا لبنها راح علي فين
راح لديابه جوا الغابه
وسابوا غلابه على الصفين
ناموا ولموا الحلم وسموا
صحيوا لقوها بقت نصين
بقرة حاحا مش نطاحه
بكل صراحه لبنها يكفي
ويسد الدين
………………………