بقعة قديمة ….عامية بقلم وحيد علي الجمال
بقعة قديمة ….عامية بقلم وحيد علي الجمال
بقعة قديمة في بدلة جديدة
رافضة تروح وبأي وسيلة
ما بقاش فيه حلول ولا حيلة
أخرج من دوامة الحيرة
زي الحسنة في وشي مثيرة
كل العمر ما يسبق خطوة
كل ما تكبر في التصويرة
لو أخلصت في طهر النية
كنت محيت ف ذنوبك مية
ولا ظهرت لك جرسة قديمة
دايمًا روحك ليها أسيرة
إن وضّيت نفسك بالفرحة
تلقى الغصة كبيرة واضحة
كأنك متلبس بجريمة
من غير ما أدخل في التفاصيل
مش راح أسيبك في التعليل
ولا هاركب موجة التحليل
وأعمل فيها خبير تأويل
أصل الحلم ما كانش تقيل
مش محتاج لف وتضليل
ولا هاطلب من شخص عويل
ما بيعرفش غير التطبيل
يخفي لي بقعة قلب عليل
حاول ينسى فشاف الويل
لا هفسر كل اللي هيجرى
ولا حدوتي هتنفع تجري
تركب قطر العمر الماجري
وتغير في تاريخي الهجري
وتبدل في ثوابت فكري
هوب لقيتني واقف مع خيبتي
وبغير شكلي وتسريحتي
من غير أي دليل يسترني
هي الفتوى تخص قصيدتي؟
ولا الحكم في متنه مشاع؟
يدي الحق لأي بتاع
يشتري فينا أو يبتاع
ابن الأصل مهش بياع
مهما هيكتب أو يلتاع
ممكن يعدل في الأوضاع
أوعى تصدق أي مشاعر
أو يلعب في دماغك شاعر
لو أقسم لك بالإبداع
شبر الميه أنا بغرق فيه
مهما يأدفّ قلبي عليه
ولا بحر قصايد يغريه
يدخل دمي ويصفيه
يشرب منه ما بيكفيه
ظل الكدب ما جربتوش
له في الوش نمش ورتوش
لو صدقته ما تطقهوش
يبلع عين الحق رموش
حلمه سراب وحقيقته فشوش
عمر الشعر ما كان مهووس
ولا يبيع للناس فنكوش
ولا يعرف في الحلق حوش
يركب عرش الكلمة بزهده
ولا بيطاطي لناس بكروش
أنا ساحر ومعايا حواة
برمي عصايتي وسط طغاه
تلقى الروح تصرخ بالآه
ولو قلبتي في قلبي الغجري
مش هتلاقي البقعة اياها
دابت جوه الوجع الازلي
