بيتنا القديم – شعر عامية

بيتنا القديم
مليان حكاوي وكلها
فرح وهنا
كانت حيطانه الني
واصله للسما
كانت عفا كانت دفا
كانت شفا بيتنا القديم
كان للغنا طعم وحلاوه
في بوقنا
نتلم نضحك كلنا
ولا كانش فيه يوم
مشكله
كان الغنا زي البنا
من غير تعب
كان الرضا مالي الوشوش
ولا غش كان ولا كان
رتوش
ولا كنا ابدا يوم وحوش
ناكل في بعض وبالحيا
كان الابتسام
هو الدوا
كنا نطير كدا في الهوا
زي الحمام فوق م الغيطان
يملا الشجر
وفي عز ماتلاقي المطر
نفرح ونجري ونتبدر
ونعدي اوقات الخطر
بيتنا القديم زي القمر
في العتمه يضوي
ماهوش حجر
كان الغنا زي الصلا
وقلوب في سبحه مئصله
والفجر جاي وفي كفه نور
بيزق باب ويهد سور
يرمي الوجع وسط البخور
بيتنا القديم راح
وانتهى
خاد الفرح والاوبهه
مافضلش غير حبة صور
نفضل يوماتي نعدها
…………………

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى