بين الأمل والموت – شعر عامية
بين الأمل والموت – شعر عامية
اشرف الشناوي شاعر عاميه البرامون -المنصوره
ياعم ياماشي عالشط اومباشي
تعدل وفي العمه واوسع مافيك زمه
الخيل بيرمحها مايجيب مدا ليها
ياعم ياطالع النخل ماطالع
لسه البلح أخضر ولا بان لنا لونه
لا أحمر ولا أصفر ليه بس بتشعطر
والأرض ماليها
ياعم ياواقف عالشط مستني
قبلك هنا ياما كان حد بيغني
لما الحياه بانت اسمر على بني
سافر وفي العتمه شايل معاه ازمه
بيكسر القضبان الهم بانيها
ياعم ياعايم البحر ماله كبير
بيكسر المجاديف
يصرخ وموجه مخيف
ساعات ينام عالشط
يحضن وفي العشاق
وساعات يروح لبعيد
تلقاه ملان تجاعيد
كانه كهل عجوز ساند على العكاز
شايل معاه الغاز والكل حار فيها
ياعم يانايم والحلم فيك عطشان
التوت صبح عريان من كترة الغربان
فين الحمام والدار والقطن بالنوار
والأرض تحبل نور والنور يعدي السور
يبدر غيطان البور بالفل والياسمين
ويلف في البساتين ماسك في ايده الفاس
والفجر صحا الناس دور سواقيها
ياعم يابو الشال والعمه مظبوطه
والأرض فيها الخير قته على قوطه
دار الزمان واندار والشمس مبسوطه
ترمي الدفا عالدور يجري العجل ويدور
تطلع بنات الحور والشعر عالقوره
ياعم يافنان قوم خدلنا صوره
نتوضي بالابريق والباميه بالتوره
ونهز فرع التوت قبل الزمن مايفوت
نلقي الاماني تموت
مانبنش في الصوره
………………….
