خطين سود!!! – شعر عامية
خطين سود!!! – شعر عامية
محمود عفيفي دومه
ترويسة الصفحات
صورة وخطين سود
واسم للي مات
وصبا بيبكي ف عود
والمهنة والمحاسيب
علي اسم كام.موعود
علي طفل من الأنابيب
علي كام لقب رنان
لبغل علي كام ديب
فلانة بنت فلان
والكورة ليها نصيب
رجوج راجل ع مان
علي اسم كام لعيب
وكام واحد كغثاء
بوظيفة مرموقة
جمعية التعساء.
والخالة مبروكة
و منتدى الظرفاء
وعويس واخوه روكا
ع كام ناعي واعلان
وتبقي كذا ميزا
جمعية الدراويش
مع رسمة لبريزة
علي ناس بتقرا الكف
والست دي عزيزة
والنعي هاج واهو ساب
ودخلنا ف الأنساب
وواحد سيبك منه
واسمه مش مكتوب
وده لسوء ظنه
نسيب لعيلة الوحش
وشريك كمان ف الفول
صهر الحمار والجحش
وقربب لعيلة الغول
وزوج لجزمة قديمة
ومدوبه لرباط
وخال لكل من
كام جزمجي وخياط
عم دباجة ولقب
والضرب ف الخلاط
والرقع حياني
واللطم تحت الباط
زوج خالة ابن الأيه
ال هناك موجود
وكان ده حتة بيه
وقرد وابن قرود.
تنعي جنابه وسيادته
نقابة المظاليم
تنعي سيادته و جنابه
روابط الحرافيش
ومكوجي وحلاق
ونقابة الطرابيش.
بمزيد كتير م الأسى
تنعيه جموع طواليش
والجنيهات يمتنعوا
قاصر على الملاليم
النعش كان م القش
أما السند خوصة
حضر وشارك الدفن
جريد وكام بوصة
واترست الصفحة
بأسامي ماقابلهاش
وكام أسم لحرامي
وجنبه كام بكاش
وشيخ منصرالناحية
من عائلات نتاش
وناس سمع عنها
لو كان قابلها لعاش
ولا كان يموت م الجوع
ولا كان يعيش أشاش
مع أنه كان وسطهم
من بدري ف الأنعاش
والدوام لله!!!
