دكان وحيد الجمال – شعر عامية
دكان وحيد الجمال – شعر عامية
وحيد علي الجمال
جتلي بنت وكات ملاك
تشتري شوية حاجات:
مصاصات، بندق، لبان،
شيبسي، نايتي، وبسكوتات.
لو لقيت حبة مغات..
هات معاك سكر نبات!
لو لقيت إخلاص محوج،
قلب أبيض مش ملون،
حب طازة مش مدوِّد،
وِدّ صالح مش مصالح،
وشّه مش مقلوب وكالح،
لو زعل منك يسامح،
ضحكته تخض الملامح،
حضنه أوسع م الجوامع،
يفدي روحك بالجوارح،
فِكره دايماً فيك وسارح،
المكان من بعده فارغ،
العسل في غيابه مالح،
صاحبي يفديني بنفسه،
وبفلوسه وبعياله..
أوعى تنسى يا عم صالح:
دستتين حبلين مشابك!
لجل ما اغسل عين جيراني،
اللي شابكين فوق حيطاني،
محشورين دايماً في حالي،
لَمزهم خارم وداني.
مهما تغسل في الأماني،
تلقى مسحوقك شيطاني!
الوَسَخ لوِّن بيباني،
والحسد نفّض شبابي،
عجّز القلب العصامي.
قولي تاني.. عايزة إيه؟
لجل قلبي يشتكيه
لسه باقي كام جنيه؟
عايزة دنيا هواها وردي،
وف دفاها أروح وأشَتّي،
وفي نسيمها الصيف يهدّي،
عمري ما ازعل فيها وأبكي،
فرحي فيها يكون مقاسي،
نفس طولي ونفس قدّي،
الوحوش ممنوع تعدّي،
أو تعكّر صفو وِدّي،
مش هَصدّق “قالوا.. قولنا”،
حتى لو خالف ضميرنا،
والخلايق يوم تعبنا..
حق ربك هو ديننا.
عايزة إيد تعرف تطبطب،
الحنان في وجودها يكبر،
والمرار لو مسّ جوفي،
يزرع الصبر في جروحي،
مهما ريحك هزّ روحي..
ضهري مصلوب بالتحدي!
قولي تاني.. عايزة إيه؟
حلم دافي وقلب صافي،
خِلّ بيزوّد عفافي،
مهما كان بحر التجافي..
عايزة دنيا بدون ديابة،
اللي نهشين في الغلابة،
عايزة حلم وله فانوس،
نوره مانع مية كابوس،
فوق جبينه راح نبوس!
وحيد علي الجمال
هذه القصيدة نتاج مجاراه لقصيدة الشاعرة الراقية عفاف محمد وبها بعض من كلماتها الراقية Afaf Mohammad AbdElsadek
