دموع كداب – شعر عامية
دموع كداب – شعر عامية
وحيد علي الجمال

خسرت معاه رهان قلبي
ودفتر فيه سبع أحلام
وكام عنوان لكام بستان
وكم كبير من الخذلان
ونفس الغلطة تتكرر
بسيب الحلم يتفسر
ويتمرر ويتفلتر ويتكرر
ويتصرمح مع التنجيم
ويرمي بياضه للأوهام
ما وشوشتش ودع بعده
ولا مرة في يوم بعته
لحد في يوم قلب وشه
بلاش تفرح كده عافية
عشان الفرح يتحقق
لازمله شروط
وكام تعويذة مكتوبة
على أصغر جناح كتكوت
وكام نقطة لدم الحوت
وكيس فاضي من السلوفان
عشان تملاه دموع تعبان
وبودرة صفرا م العطار
تولّعها مع الأشباح
وترسم حرف أو حرفين
على ضهر الأمل بالليل
تشعوذ حرفك الخارج
عن المألوف
وتغسل دمك المخطوف
لقيتني في شرنقات الجهل
بدور ع النجاح السهل
دعيت سرب الحروف السمر
وأنا قلبي بيتلظى ما بين الجمر
وكان طلب الحضور طوعًا
ولو رفضت يكون كرهًا
ولو بالأمر
عملت لنفسي مليون تست
عشان روحي تكون حاضرة
وتاخد وقتها في الريسك
وأدفيها في حضن المسك
فكلمت الهوى في السر
فطمني وكان كداب
وأقسم لي بأن الحب
اللي كان بينا ملوهش كتاب
رجعت وقفت في المحراب
وتوبت ساعتها من الأحلام
وقبل الفتوى ما تعدي على قلبي
عشان تعلن وبعد صيام
بأن الشاعر العاشق ماهوش أواب
ولو عمل القصيدة حجاب
ولو كان فيها مليون باب
دموع الشاعر العاشق
دموع كداب