رتّلي – شعر عامية

رتّلي آياتِ ربك
تلقي أسئلتك مُجابة
وافتحي للحب قلبك
حُبي دعوه للإنابة

سبّحي بسبحة أناملك
وامسحي جبينك هبابة
وادعي بعد الفجر لابنك
انتي دعوه مستجابة

بس يمكن غيّروا حبّه ف ملامحك
لما مسكولنا الربابة
عزفوا بيها لحن ما يشبه للحنك
لحن مصحوب بالكآبة

طلعوا وقفوا فوق كتافك
لا وقالوا احنا الصحابة
دقّوا طبل وشنّوا حربك
ضد أحلام الغلابة

والغلابة صانوا عرضك
ياما من إيد الديابة
فافتحي لهم مرة صدرك
واحضنيهم وبطيابة
من زمن ما شافوها منك
كأنه ممنوع من الرقابة

رتّلي آيات ربك
واسجدي سجدة تجلّي
وادعي ربك يمحي حزنك
تقدري تبني وتعلّي
تبني مستقبل لشعبك
يزرعوا فرحك تملي
يرفعوا لك تاني عرشك
ولمكانتك تستغلي
تقفى شامخة وسط أرضك
تحفظي فيها كل ملّي
تنشري من تاني علمك
اللي كان دولي ومحلّي
تترسم من تاني صورتك
يركع العالم يصلّي

رتّلي آيات ربك
واحكمي بيها وولّي
تلقي كل الكون ده ملكك
واللي تاه عنك.. تدلّي

رتّلي آيات ربك
فسّري لنا كل آية
الخشوع اللي ف تلاوتك
كل حرف وله حكاية

نفسي أموت ساجد في حضنك
والسجود محتاج ربايه
ما تسيبيش للظلم نفسك
كلنا هنكون ضحايا

ليه بتداري في عجزك
انتي لسه يا غالية شابه
حتى بصي في المرايه
ايش يكون كام ألف سنك
وانتي قدوه للصبايا
د اللي تتكحل بكحلك عشقها بينول رضايا

متسيبيش للظلم نفسك
وتسيبيني انطحن تحت صوان الرحايا

رتلي

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى